Friday 星期五 - 阴天

星期五
重要通告

东主事忙，無限期停筆直到另行通知為止。

Friday 星期五 - 晴天

星期五
心情复杂

今日係年廿八，过多两日就要过年
照直嚟讲个心情应该係好开心先係
点知前几日係我身上发生咗D唔愉快嘅事
搞到我依家嘅心情有D复杂而闷闷不乐

我大伯係前几日因为交通意外而入院
当时听到个消息当场吓咗一跳
而且係好严重嘅车祸，医生话要有心理准备
果然冇几耐，坏消息就係电话度传出嚟
大伯佢过身咗。。。。

临过年前发生咁嘅事的确唔好受
个种心情可想而知係几咁复杂
而且个交通意外係被他人撞，或是自撞？
到依家依然係一个谜，而且案发现场冇目击证人
当时发生乜嘢事都冇第三者知道

不过睇D伤势可以判断係俾他人撞
而且条仆街重係撞咗就走个种
可靠消息重话大伯佢係托咗成两个钟
先俾佢返紧工而路过嘅同事发现
而迟咗送去医院，而最后都係返魂乏术

年要到，唔想咒得太多
希望你条撞咗就走嘅仆街冚家铲行路小心D
你避得一时，唔避得一世
俾我知道係边个嘅话我一定唔会放过你

Friday 星期五 - 晴天

星期五
忙到气咳

距离农历新年嘅日子只係剩一个星期咁多
但係好奇怪，我完全感受唔到D气氛
係慢热？或係係经济不景？
又或者係个人老咗，对D过年过节嘅嘢唔入心
冇晒感觉？冇晒反应？

我剩係知道，成个星期忙到气咳
东奔西跑为搵两餐，为储返个钱过年
最近个经济波动咁唔稳定，顶硬上都要
买新衫新裤过年？细路个阵就有
家阵咁嘅时势，惗下就好

唔知係挨得多，定係D天气唔好
寻日重病鬼埋，攞咗日病假
咪惗住可以休息吖
D时间全部用晒到嚟搞D私人嘢
不过好彩，条命生得够硬
扑来扑去个病重好得快过瞓係屋企

最后要同位老死讲声唔好意思
推咗你个餐咁有意义嘅豪华晚宴
皆因有D事要做真係走不开
下次有机会嘅一定唔会托你手踭
讲得出，就一定做得到～

Friday 星期五 - 阴天

星期五
风平浪静

惗嚟惗去。。。。
硬係觉得呢个星期冇乜嘢好写
返工放工，周围去
唔经唔觉咁就到咗星期五

星期一就比较好D
之前个室内篮球场租约期满
因为易手冇再续约，而由政府暂时接管
加上手续上嘅处理用咗唔少时间
要等到新嘅一年先可以继续租落去

不过都算几好喇，D照明系统换晒新嘅
比以前光猛咗好多，冇得顶
唯一唔满意係个地板，唔够靓
整体嚟讲都算满意喇，比起室外嘅好得多

其他日子。。。。
都係周围去，搵下D外水咁喇
冇乜特别。。。。

Friday 星期五 - 雨天

星期五
咁又一年

唔经唔觉，咁就过咗一年
悠悠荡荡咁就放咗成个星期假
年终假期就唔经唔觉咁就冇晒咗
估唔到一放完假返到公司就係星期五
睇嚟又係时候写返篇周记先得喇

新嘅一年，紧係惗住有个新嘅希望喇
今年遇着经济风暴，个个冇啖好食
係人都希望可以平平安安咁度过
我係个平凡嘅打工仔，一样唔会例外喇

家阵咁嘅心情，暂时都唔想惗咁多嘢住
惗得多都烦，目前为止一切顺其自然就最好
其他嘢。。。。等过完农历新年先算

上次讲要介绍个套漫画都整理得七七八八喇
过多两日就会放上嚟，到时记得留意下囖

Friday 星期五 - 阴天

星期五
悠长假期

踏入年尾，D无谓节日多之余
连D假期都特别多，係D钱唔见得会多
眨下眼，一年话咁快就过咗
睇嚟又要准备面对新嘅一年喇

呢个星期嘅节日咁多
相信对大家嚟讲紧係值得高兴嘎喇
但係对我嚟讲反而係害咗我

公司D人个个攞晒假，剩返我一个
搞到D嘢要一个人做晒，个部门一个人睇晒
赶死赶命，个人几乎要癫咁腻
好彩今日已经係星期五，冇咁多嘢忙
如果唔係咁搞落去个人唔死就假

平安夜个晚周围都係车，鬼死咁塞
D人全部出晒嚟，都唔知有乜咁好庆祝
我唔係基督徒，踎係屋企听hardcore好过

Friday 星期五 - 晴天

星期五
贵人事忙

上星期个周记先讲到可以轻松咁过嘅
点知嚟到呢个星期就完全唔同晒

踏入年尾，则係每年最忙嘅时候
加上係设计方面有D转变，所以D进度都拖慢咗
被逼要嘥多D时间係设计上，搞到个头都大晒
连篇周记都唔记得写，到咗星期六嘅今日先知道
係度趁有D时间，写返篇补返数先

最近本人沉迷于一部讲述重金属摇滚嘅漫画
内容当中嘅表达手法同埋D画风都劲夸张搞笑
呢部漫画係日本同香港当地都牵起咗唔少话题
而且重已经开拍成电影添，风头可以话係一时无两

迟下会係度介绍俾大家认识，记得密切留意囖

Friday 星期五 - 雨天

星期五
风继续吹

呢个星期D心情都感觉非常之懒
几日假期加埋D雨成日落唔停
搞到个人死蛇烂蟮咁冇晒D心情做嘢
连写下个blog都懒，哈哈。。。。

基本上呢个星期都冇乜特别嘢好写喇
遇着假期不外乎係行下街、食下嘢或者饮下茶咁过
手头上D工作进度都因为假期而拖慢咗

不过都好嘅，忙里偷闲不嫐都係我嘅做人宗旨
趁住呢几日假期都休息咗唔少，条气都顺返D
个人都冇之前咁攰喇，剩係有D懒咁喇
哈哈。。。。

弊，突然之间有D眼瞓添
今日讲住咁多先啦，係咁～

Friday 星期五 - 阴天

星期五
劲眼瞓，好眼瞓

今个星期可以话係冇觉好瞓，点解？
工作量多就总所周知喇，连放咗工都鬼死咁唔得闲

日前手头上进行紧D嘢，所以被逼要搞到好夜先瞓
夜瞓都唔所谓，弊就弊连餐晚饭都要成12几点先食
有时候甚至连晚饭都未食就大觉瞓
连饿係乜都唔知，睇嚟咁搞法个胃唔穿窿就假
等下星期搞掂晒D嘢，要慢慢咁恢复返D正常人嘅生活先得
费事搞到老嚟周身病痛，有钱冇命享先阴公～

上星期驾车係Taman Bahagia LRT对面D住宅区搵人
冇意中俾我发现咗有个拥有一级设备嘅室外篮球场
夜晚个阵有灯光照亮之余，个场地环境同埋D设备重好正～
前几晚趁住有些少时间就同亚高佬两条友走去试下
果然冇令我失望，只係个地面有些少部分唔係咁理想
整体嚟讲都算唔错，有成80分咁多～

边位有兴趣一齐打波嘅可以係度联络我或参考以下嘅网址：

http://cforum2.cari.com.my/viewthread.php?tid=1410800&page=1&extra=page%3D1#pid51401298

今期嘅周记就到此为止，係咁先～

Friday 星期五 - 阴天

星期五
雨过天晴

虽然呢个星期D工作量唔係讲好多
但都俾D嘢搞到拿手唔成势，鬼死咁狼狈
手头上跟紧嘅job改完又改，换完又换
真係可以用句中国话嚟到形容：
“一个头两个大”吖～

惗住剩係返工嘅时间忙喇。。。。
点知放咗工都一样过得唔係好清闲～

星期一：
打波打到成10点几先返屋企，食埋饭
搞掂晒D嘢都成2点几先可以瞓

星期二：
去friend度练gym，食埋饭
返到屋企，搞掂晒D嘢成1点几先可以瞓

星期三：
落雨天，放工反到屋企再出去买包饭
都要塞车塞到成10点几先返到屋企
搞掂晒D嘢成2点几先可以瞓

星期四：
一样係落雨天，塞住车去吉隆坡吃打边炉
食得嚟，返到屋企都成12点几
搞掂晒D嘢成2点几先可以瞓

星期五：
一阵放工，约咗人去吉隆坡度叹高级嘢、食靓海鲜
跟住搵个friend饮下茶，联络下感情
又跟住要去载个係新加坡返嚟嘅friend返屋企
搞掂晒D嘢我睇要成3-4点先可以瞓

星期六：
晨早就要返工，到1点先放工
跟住就要去打波，打到7点
又跟住就同班friend去吉隆坡食蟹
有冇下一场都重未知，睇嚟冇3-4点都唔洗指意瞓

星期日：
晨早去跑步，跟住去街市食嘢，叹茶
又跟住落嚟就重未知，不过都唔洗指意可以乐得清闲

呢个星期劲忙，劲多嘢做
晚晚搞到咁夜先瞓都咪话唔伤身
睇嚟下个月个几日假，真係要係屋企悠悠闲闲咁
大觉大觉咁瞓返够本先得

Friday 星期五 - 阴天

星期五
阴风阵阵

前晚食错嘢，搞到食物中毒
再加埋呢几排操劳过度
伤风感冒同喉咙痛一次过嚟晒
搞到寻日要攞病假係屋企度休养
个星期五周记要嚟到星期六先写到
真係唔好意思咁多位

呢个星期基本上嚟讲都冇乜特别嘅
之前都讲到手头上D大job差唔多都搞掂咗
依家就係度忙紧D女装上嘅嘢，都算唔错喇
起码冇之前D嘢咁烦，惗住可以过得休闲D咁嘅
但係人算不如天算，俾D病痛搞咗成日
不过好彩，最后都冇乜大碍
当係攞日假，俾D时间自己休息下喇。。。。

今晚係《佳礼雪隆乐龄篮球会》成立以嚟嘅第一个活动
有兴趣嘅可以参考以下嘅网址报名囖

http://cforum2.cari.com.my/viewthread.php?tid=1410800&page=1&extra=page%3D1#pid51401298

係度希望个活动可以顺顺利利咁成功举办喇
今期嘅周记就係咁多，係咁～

Friday 星期五 - 阴天

星期五
阴阴的天，灰灰的街

忙碌嘅工作生活应该会暂时告一段落喇
手头上嘅job都差唔多已经搞到七七八八
每年呢段时间都係最忙碌、最多嘢做嘅
冇计喇。。。。年就嚟到。。。。
要赶住起货，用嚟俾农历新年之用嘅
重有圣诞同埋新年D嘢，都咪话唔赶死人吖

啱啱先可以算得上係搞掂晒D嘢，唞都未唞到
转下眼咁又接到个新job，而且重几大单下
不过都算好彩，批嘢唔係好赶住要
而且难度上都唔係咁辛苦，算係D简单嘅job
呢次都总算可以有些少时间休息下喇

唔讲咁多喇，难得先可以休息下
而且寻晚煲DVD煲到三点几先瞓
晨早七点几就起身，都咪话唔攞命吖
家阵对眼重鬼死咁攰添，係咁先喇～

Friday 星期五 - 晴天

星期五
返工一个样，放工一个样

呢个星期都算得上係过得几健康下嘅
星期一同星期二都远征到唔同地方打波
得到唔少经验之余重流咗唔少汗
而且重认识咗几位志同道合嘅朋友
今次都可以算得话係受益不浅

跟住落嚟个几日都冇乜去边
剩係同D死党饮下茶，食下嘢咁
皆因近排比较忙，早晨返工就忙到放工
返到屋企个人鬼死咁攰，几乎要散咁济
连上个星期借返嚟个几套DVD都冇时间睇
个心係度惗：
成日搞到个人咁忙碌都唔知为乜。。。。
个答案。。。。你知我知喇。。。。

最近个Blog嘅进度会比之前慢少少
原因係上面已经有写咗嘎喇，希望各位唔好见怪
今期嘅周记就係咁多，係咁～

Friday 星期五 - 晴天

星期五
忽冷忽热

架车最近唔知发乜嘢神经，呢度坏完到个度坏
上个星期先整完个防盗系统
点知呢个星期就轮到个冷气泵流水
重搞到乘客位度几乎湿晒
唉。。。。睇嚟呢一次唔破财都唔得囖。。。。

不过除咗架车发下神经之外
呢个星期对我嚟讲都算几有意义嘅
前几晚同亚高佬去USJ度睇苏丹杯八强嘅比赛
竟然俾我撞返读书时期嘅死党兼半个师傅亚威仔～

计计下自从毕业之后都有成六至七年冇见面喇
今次嚟到睇比赛我都有预感会撞返佢嘅喇
皆因佢以前係个篮球州手兼县手
所以佢今次嚟参加对我嚟讲都唔算出奇嘅
一问之下原来佢嘅队已经入咗四强
可惜嘅係寻晚佢个场四强比赛我冇去到睇
不过我相信如冇意外，都应该入咗决赛嘅喇
今晚决赛一定要去捧场支持下先得～

讲开又讲，今时今日我手波有返咁上下水准
真係要多得亚威仔你当年嘅指点同教诲
罚球、中距离射球、三分球个方面你真係教咗我唔少嘢
係度真係要同你讲声多谢加无限感激先得～

如冇意外，下一季嘅苏丹杯我可能会参加
如有机会对到你，我唔会留手嘅囖。。。。
不过你咁劲，实唔怕嘎喇～
哈哈～

Friday 星期五 - 阴天

星期五
细雨绵绵

基本上嚟讲呢个星期都冇乜特别事发生嘅
但係都俾D兼职搞到我要扑嚟扑去
见完呢个见又要见第二个，鬼死咁忙
不过都好彩，都算得上係搞掂咗喇D嘢
个心係度惗：
唉。。。。鬼叫你穷咩。。。。
唯有顶硬上喇～

计下计下
亚高佬只脚拗咗柴都有成两个星期咁耐
睇咗几次医生，重入咗几次厂添
睇嚟伤得都几严重下
喂，你快D帮我好返啊
我对新鞋等紧你同我1on1嘎，哈哈～

亚丽妹间公司终于搬咗
而且重搬到冇雷公咁远添
下次要饮茶就冇好似依家咁近喇
不过咁啱得咁翘
佢嘅新公司就搬咗去我个supplier间公司附近
下次得闲行开个区都重可以搵下佢嘅
有我咁嘅朋友算唔话得了卦，哈哈～

Friday 星期五 - 雨天

星期五
极度潮湿

顶你个肺，最近D交通唔知发生乜事
由返工到放工都係得个塞塞塞字。。。。
加埋落雨天，塞係条路度简直生不如死～

近排唔知係咪个人老咗，或者係无聊过头
再度迷恋返打篮球，打咗都有几日喇
太耐没打，成个人几乎散晒～
再加埋剩係着对Jack Purcell，对鞋完全没D气囊
搞到我对脚重鬼死咁痛～
唉。。。。睇嚟唔认老都唔得喇。。。。

前几日，约咗时间话放工去亚Kenny度整车
点知放工个阵又落雨，搞到迟晒大到
佢都算唔话得喇，落咁大雨都係度等我
正不愧係我识咗十几年嘅老友～
check完架车，就同亚Kenny一齐去食夜晚个餐
两个人边食边倾，倾咗唔少关于生意上嘅嘢
佢係生意上嘅经验分享令我受益不浅
呢餐饭食得真係有意义～
佢重卖埋张单，搞到我鬼死咁唔好意思～

皆因着对Jack Purcell嚟打篮球真係好不掂
所以寻晚就决定同亚高佬两条友去谷中城度睇波鞋
但係D款鬼死咁少，搵嚟搵去都没对啱心水
加上budget上嘅预算唔係好多，最后都係空手而归
睇嚟唯有见步行步喇。。。。

Friday 星期五 - 晴天

星期五
风和日丽

几日前放咗工冇嘢做
就约咗两个旧同学，亚丽妹同亚强哥饮茶
惗惗下，自从亚丽妹换工之后
都有成半年冇见过佢咗

一排冇见，大家都几多嘢倾下
好耐都冇试过咁过瘾喇
唔经唔觉都倾咗有成三粒钟咁多

睇见佢，比以前成熟咗
再听返佢讲D关于新公司D嘢同运作
先知佢係度学咗唔少嘢
接触D人同嘢多咗，连个人都变成熟咗
係度想同佢讲声呢D係好事嚟嘅
继续加油囖，亚丽妹～
哈哈～

呢几日，有个朋友同我争论咗个问题
佢话，一个人嘅设计风格唔可以改变
但係一个人嘅设计宗旨就可以改变
我係度唸，有冇搞错啊
咁都得？

皆因大家嘅惗法唔一样
我都唔同佢吵咁多
免得为咗D小事而伤大家感情

迟下我会写篇关于以上所争论嘅嘢
表达我对呢个问题嘅惗法
同我对佢唔认同嘅意见等等

呢个星期嘅周记就係咁多
到此为止～

Friday 星期五 - 晴天

星期五
今日好晒

啱啱放完假，冇所事事嘅两日假
带住沉重嘅心情，顶住好猛嘅太阳
8点就到公司，落车晒到9点等人开门
顶你个肺，几乎晒到中暑

返入公司，哗。。。。
先知呢一刻我最爱嘅係部冷气
猛咁吹，係咁吹
好耐先调剂好返条气，舒服晒～

唔知点解，D假期mood仲係度
单吊一日，做一日放一日
搞到D心情唔上唔落，鬼死咁难受

再加上近排对眼冇乜舒服，睇嘢有D攰
都唔知係不係近排煲太多DVD咗
过两日真係要搵医生睇下先得

唔讲咁多，俾对眼休息下先
係咁～

Friday 星期五 - 雨天

星期五
晨早落雨，中午落雨，下午又落雨

食完晏，返到公司
做做下冇idea，就去食支烟
同同事吹下水，杀下D时间

望住个天，阴阴地
更加冇mood，更加无聊

吹完水，食完烟就返到电脑前
唸下idea，等放工
一阵放工返到屋企，对住四面墙
都不知要做D乜
劲无聊的一天啊～