Talk 弊 - 生活公式

唔知点解，虽然有时D日子重未到
但都已经可以预计到跟住落嚟要做嘅嘢
可能我已经习惯咗呢种咁有计划性生活方式
好似有种人，过住D见一日过一日嘅生活
真係唔係本人可以接受嘅。。。。

我都几享受呢种生活方式嘅
工作忙碌个阵时，有压力个阵时
就要学识点样忙里偷闲
得闲做下运动、打下波，食下靓嘢、叹下世界
又或者係行下街、买下嘢，睇下书、自我增值下
虽然有阵时係要扑嚟扑去几忙碌下
都好过日日坐係屋企度，食饱瞓、瞓饱食
又或者好似D电车男咁，成日对住部电脑
乜都唔做，D日子平平淡淡咁过
我惗我真係可以死俾你睇

对你嚟讲，咁嘅生活方式
算得上係好充实，又或者係好忙碌叻？

俾你，你又会揀边样？

Friday 星期五 - 阴天

星期五
雨过天晴

虽然呢个星期D工作量唔係讲好多
但都俾D嘢搞到拿手唔成势，鬼死咁狼狈
手头上跟紧嘅job改完又改，换完又换
真係可以用句中国话嚟到形容：
“一个头两个大”吖～

惗住剩係返工嘅时间忙喇。。。。
点知放咗工都一样过得唔係好清闲～

星期一：
打波打到成10点几先返屋企，食埋饭
搞掂晒D嘢都成2点几先可以瞓

星期二：
去friend度练gym，食埋饭
返到屋企，搞掂晒D嘢成1点几先可以瞓

星期三：
落雨天，放工反到屋企再出去买包饭
都要塞车塞到成10点几先返到屋企
搞掂晒D嘢成2点几先可以瞓

星期四：
一样係落雨天，塞住车去吉隆坡吃打边炉
食得嚟，返到屋企都成12点几
搞掂晒D嘢成2点几先可以瞓

星期五：
一阵放工，约咗人去吉隆坡度叹高级嘢、食靓海鲜
跟住搵个friend饮下茶，联络下感情
又跟住要去载个係新加坡返嚟嘅friend返屋企
搞掂晒D嘢我睇要成3-4点先可以瞓

星期六：
晨早就要返工，到1点先放工
跟住就要去打波，打到7点
又跟住就同班friend去吉隆坡食蟹
有冇下一场都重未知，睇嚟冇3-4点都唔洗指意瞓

星期日：
晨早去跑步，跟住去街市食嘢，叹茶
又跟住落嚟就重未知，不过都唔洗指意可以乐得清闲

呢个星期劲忙，劲多嘢做
晚晚搞到咁夜先瞓都咪话唔伤身
睇嚟下个月个几日假，真係要係屋企悠悠闲闲咁
大觉大觉咁瞓返够本先得

Justice - D.A.N.C.E MV

对我嚟讲，音乐与艺术往往都只係一墙之隔
好多时候，听觉加埋视觉而混合出嚟化学作用唔係嘢少
就好似跟住落嚟我要介绍嘅呢首歌咁

由法国时尚班霸厂牌ED BANGER RECORDS所主导
旗下人气度爆灯组合Justice嘅呢首D.A.N.C.E
除咗听觉上将电子音乐发挥到拍得住电子先驱Daft Punk之外
视觉上嘅另类创新度更得人所敬佩
尤其是係对我呢种咁骑呢嘅人

係MV度出现嘅每款Tee
都係由ED BANGER嘅艺术总监SO ME所设计
创作极具个人风格，颜色鲜艳又带点卡通格调
意识方面重好大胆、好放
再配合埋首歌嘅Old Skool Electro法式电子节奏
两方面简直就配合得天衣无缝，潮到爆～

首歌更获得08年度欧洲MTV Awards最佳Video奖
唔讲咁多，立刻去片俾大家感受下
係咁先～

Friday 星期五 - 阴天

星期五
阴风阵阵

前晚食错嘢，搞到食物中毒
再加埋呢几排操劳过度
伤风感冒同喉咙痛一次过嚟晒
搞到寻日要攞病假係屋企度休养
个星期五周记要嚟到星期六先写到
真係唔好意思咁多位

呢个星期基本上嚟讲都冇乜特别嘅
之前都讲到手头上D大job差唔多都搞掂咗
依家就係度忙紧D女装上嘅嘢，都算唔错喇
起码冇之前D嘢咁烦，惗住可以过得休闲D咁嘅
但係人算不如天算，俾D病痛搞咗成日
不过好彩，最后都冇乜大碍
当係攞日假，俾D时间自己休息下喇。。。。

今晚係《佳礼雪隆乐龄篮球会》成立以嚟嘅第一个活动
有兴趣嘅可以参考以下嘅网址报名囖

http://cforum2.cari.com.my/viewthread.php?tid=1410800&page=1&extra=page%3D1#pid51401298

係度希望个活动可以顺顺利利咁成功举办喇
今期嘅周记就係咁多，係咁～

Talk 弊 - 篮球衫

星期六个日又一次以超荀价25蚊
係高峰广场入手咗件Adidas嘅篮球衫
蓝白colourway，贴身剪裁加埋排汗质料
咁嘅价钱，唔买又点对得住自己啫係咪先～

Friday 星期五 - 阴天

星期五
阴阴的天，灰灰的街

忙碌嘅工作生活应该会暂时告一段落喇
手头上嘅job都差唔多已经搞到七七八八
每年呢段时间都係最忙碌、最多嘢做嘅
冇计喇。。。。年就嚟到。。。。
要赶住起货，用嚟俾农历新年之用嘅
重有圣诞同埋新年D嘢，都咪话唔赶死人吖

啱啱先可以算得上係搞掂晒D嘢，唞都未唞到
转下眼咁又接到个新job，而且重几大单下
不过都算好彩，批嘢唔係好赶住要
而且难度上都唔係咁辛苦，算係D简单嘅job
呢次都总算可以有些少时间休息下喇

唔讲咁多喇，难得先可以休息下
而且寻晚煲DVD煲到三点几先瞓
晨早七点几就起身，都咪话唔攞命吖
家阵对眼重鬼死咁攰添，係咁先喇～

Metallica 最新大牒 - Death Magnetic

Metallica 最新大牒 - Death Magnetic
共收录了十首新曲：
01-That Was Just Your Life
02-The End Of The Line
03-Broken, Beat & Scarred
04-The Day That Never Comes
05-All Nightmare Long
06-Cyanide
07-The Unforgiven III
08-The Judas Kiss
09-Suicide & Redemption
10-My Apocalypse

趁有多少私人时间可以写D嘢
就介绍下D摇滚音乐俾大家认识下喇

相信对重金属摇滚有D认识嘅人
都会对Metallica呢个乐队唔会陌生
呢队称得上殿堂级嘅摇滚乐队
对于现今嘅摇滚乐坛嘅影响依然都係咁深切
都可以算得上係本人几敬佩嘅摇滚乐队之一嚟嘅

今次要係度介绍俾大家嘅
就係佢地嘅最新大碟《Death Magnetic》
寻晚见有D时间，就好有心机咁听咗呢只碟
虽然以年事嚟讲，佢地都可以算得上係超晒龄
但係D重金属味道依然冇变到质，重係咁劲～

主音James Hetfield把声应然係咁犀利
听咗咁多年D感觉上都係冇乜点变到，rock到爆～
D歌曲水准可以话係重保持到，尤其是係演奏个部分
吉他手Kirk Hammett出神入化般嘅solo表现
简直令人听出耳油，high到爆～

只大碟嘅其中一首歌曲重係全solo演奏添嘅
叫做《Suicide & Redemption》
係度真係要重点推荐下俾大家先得～

Friday 星期五 - 晴天

星期五
返工一个样，放工一个样

呢个星期都算得上係过得几健康下嘅
星期一同星期二都远征到唔同地方打波
得到唔少经验之余重流咗唔少汗
而且重认识咗几位志同道合嘅朋友
今次都可以算得话係受益不浅

跟住落嚟个几日都冇乜去边
剩係同D死党饮下茶，食下嘢咁
皆因近排比较忙，早晨返工就忙到放工
返到屋企个人鬼死咁攰，几乎要散咁济
连上个星期借返嚟个几套DVD都冇时间睇
个心係度惗：
成日搞到个人咁忙碌都唔知为乜。。。。
个答案。。。。你知我知喇。。。。

最近个Blog嘅进度会比之前慢少少
原因係上面已经有写咗嘎喇，希望各位唔好见怪
今期嘅周记就係咁多，係咁～

Talk 弊 - Only The Strong Survive

寻晚同班friend千里迢迢去到巴生度打波
地点係巴生区某间独中，对手係班十靓岁嘅细路
练波个阵个个打到鬼死咁似模似样
睇嚟呢一次都唔会好轻松嘎喇。。。。

果然，班细路个个鬼死咁狼～
出尽全力博命咁打，真係惊死我地班老嘢会赢咁
绝招出尽之余，重好似打紧功夫咁D手手脚脚周围咁飞
本人耐唔打，对到班细路都难免会有D狼狈
而且打紧波个阵都唔知几时同被边一个细路
用咗招好似《九阴白骨爪》咁嘅嘢係我只右手度狠狠咁爪落去
我都係事后睇返先发觉有几条成尺长嘅痕係个手度

不过咁，好似我以上所讲个句：
“Only The Strong Survive”
边个强，边个就有资格留係个球场度
区区几条痕，对我嚟讲根本唔算得D乜嘢
我同班friend总共打咗四场，赢咗三场
终结嚟讲都算係我地班老嘢赢嘅。。。。

係度想讲声，你地班细路嘅底牌我差唔多已经摸清晒嘎喇
下一次我返嚟个阵时一定会报仇嘅。。。。
i will be back～ 呵呵呵呵。。。。

Portfolio - Temporarily On Hold！

唔好意思咁多位，睇嚟portfolio系列要暂时停一下
皆因近来D工作量唔知发乜鬼嘢神经突然之间多咗好多
再加上D衫裤鞋袜嘅file越堆越多，根本都冇乜时间去分类
而且係设计概念、颜色配搭、风格路线等唔同方面嘅嘢
都要嘥唔少时间嚟到编写同编排嘅

到目前为止嚟讲都依然係度整理紧unreleased版
本人会尽快咁搞掂晒所有嘅嘢先，慢慢咁编写返之前
所剩下D设计概念、颜色配搭、风格路线等嘅嘢
然之后就会恢复返Portfolio系列
希望各位可以俾D时间耐心咁等下，唔该～

Talk 弊 - 辅助装备

寻日买跑步鞋之余，都买咗D装备做辅助之用
首先要讲嘅係Nike嘅Terry Headband
近来D头发都留到几长下，尤其是係前面
当打波个阵往往会整到对眼好鬼唔舒服
而且重会阻住D视线，睇嘢睇唔清楚
所以就需要用到个Terry Headband嚟度绑住D头发
可以防止D头发整到对眼之余，重可以唔俾D汗流入对眼度

而第二样嘢都係同样嚟自Nike嘅Knee Sleeve
皆因本人只左脚之前因为打波而严重咁拗过柴
所以到咗今时今日，唔多唔少都会有D影响
为咗预防依家打波会唔小心伤到个旧患
免不了要用到个Knee Sleeve嚟度保护我只脚
寻晚试着咗，包扎后D质感都唔错下
用料上都算有心思，透气方面都做得几好

Talk 弊 - 跑步鞋

我有个习惯，就係做唔同嘅运动要着唔同嘅鞋
好似篮球要有篮球鞋，足球要有足球鞋
跑步要有跑步鞋，爬山要有爬山鞋等
就连行街嘅波鞋都要有唔同嘅分类
每样都分得很清楚，唔会捞乱咁嚟着

寻日又再度去咗谷中城度搵波鞋
不过咁次唔係搵篮球鞋，係搵跑步鞋
皆因至少有六到七年冇打过波咗
所以为咗练返条气，就决定买对跑步鞋
嚟度用嚟跑步，帮助恢复条气之用

本人出身地下层，对于名牌呢样嘢不嫐都係得个睇字
所以专门店D嘅嘢我唔会去睇，都冇咁嘅本事去买
再加上对鞋係辅助之用，所以平、靓、正会係我嘅第一选择
就係咁，我就係Jusco度以少过100蚊入手咗对Admiral跑步鞋
而且重俾埋个九折你，平、靓、正呢三样嘢都差唔多几乎有齐晒
款头方面，基本上都冇乜点要求
係咁易揀返对比较顺眼、似跑步鞋款嘅就算