Friday 星期五 - 晴天

星期五
心情复杂

今日係年廿八，过多两日就要过年
照直嚟讲个心情应该係好开心先係
点知前几日係我身上发生咗D唔愉快嘅事
搞到我依家嘅心情有D复杂而闷闷不乐

我大伯係前几日因为交通意外而入院
当时听到个消息当场吓咗一跳
而且係好严重嘅车祸，医生话要有心理准备
果然冇几耐，坏消息就係电话度传出嚟
大伯佢过身咗。。。。

临过年前发生咁嘅事的确唔好受
个种心情可想而知係几咁复杂
而且个交通意外係被他人撞，或是自撞？
到依家依然係一个谜，而且案发现场冇目击证人
当时发生乜嘢事都冇第三者知道

不过睇D伤势可以判断係俾他人撞
而且条仆街重係撞咗就走个种
可靠消息重话大伯佢係托咗成两个钟
先俾佢返紧工而路过嘅同事发现
而迟咗送去医院，而最后都係返魂乏术

年要到，唔想咒得太多
希望你条撞咗就走嘅仆街冚家铲行路小心D
你避得一时，唔避得一世
俾我知道係边个嘅话我一定唔会放过你

Friday 星期五 - 晴天

星期五
忙到气咳

距离农历新年嘅日子只係剩一个星期咁多
但係好奇怪，我完全感受唔到D气氛
係慢热？或係係经济不景？
又或者係个人老咗，对D过年过节嘅嘢唔入心
冇晒感觉？冇晒反应？

我剩係知道，成个星期忙到气咳
东奔西跑为搵两餐，为储返个钱过年
最近个经济波动咁唔稳定，顶硬上都要
买新衫新裤过年？细路个阵就有
家阵咁嘅时势，惗下就好

唔知係挨得多，定係D天气唔好
寻日重病鬼埋，攞咗日病假
咪惗住可以休息吖
D时间全部用晒到嚟搞D私人嘢
不过好彩，条命生得够硬
扑来扑去个病重好得快过瞓係屋企

最后要同位老死讲声唔好意思
推咗你个餐咁有意义嘅豪华晚宴
皆因有D事要做真係走不开
下次有机会嘅一定唔会托你手踭
讲得出，就一定做得到～

Friday 星期五 - 阴天

星期五
风平浪静

惗嚟惗去。。。。
硬係觉得呢个星期冇乜嘢好写
返工放工，周围去
唔经唔觉咁就到咗星期五

星期一就比较好D
之前个室内篮球场租约期满
因为易手冇再续约，而由政府暂时接管
加上手续上嘅处理用咗唔少时间
要等到新嘅一年先可以继续租落去

不过都算几好喇，D照明系统换晒新嘅
比以前光猛咗好多，冇得顶
唯一唔满意係个地板，唔够靓
整体嚟讲都算满意喇，比起室外嘅好得多

其他日子。。。。
都係周围去，搵下D外水咁喇
冇乜特别。。。。

Art - Detroit Metal City 底特律金属之城

デトロイト・メタル・シティ
Detroit Metal City，又名DMC
华文译为《底特律金属之城》

香港译为《爆粗BAND友》
中国同台湾等地方译为《重金摇滚双面人》
係新晋漫画家若衫公德的惊人之作

故事讲述主角根岸崇一出身於小康之家
父母双全、同细佬妹嘅关系密切，係个好哥哥
佢嘅志愿係立志做一位民歌歌手
所以就係鄉下去咗东京发展，一去就去咗五年

点知佢嘅纯情歌路完全冇知音，係佢走投无路嘅时候
被地下唱片公司Death Records嘅恐怖女社长签咗
成為死亡重金属摇滚乐队《Detroit Metal City》嘅主音
重改咗够晒架势堂嘅名，叫Krauser二世

当佢一戴上假发、穿上战甲、拿起电吉他
化妆化到一脸苍白，额头写住一個《殺》字嘅时候
上咗台嘅根岸就会变身成为嚟自地狱嘅邪惡魔王
甚至連把声都会变埋，唱嘅歌更係重金属到爆

由佢作曲兼填词嘅所有歌曲
更係以強姦、暴力、死亡為主題
同佢一直钟意嘅民歌完全係天淵之別
随住DMC越嚟越受欢迎
崇一嘅內心挣扎卻就越嚟越。。。。

睇个名就知有几rock喇。。。。

唔係讲笑，係香港都18禁！
係大马想买到？惗下好喇。。。。

香港版封面，重金属到爆！

呢句最经典。。。。

D画风夸张之余。。。。

连D内容都劲变态。。。。

图片转自：贪婪大陆

按以下网址就可以睇到呢套咁经典嘅漫画
本人诚意推荐～

http://www.99770.net/Comic/3449/

睇完咁多关于DMC嘅嘢，重係觉得唔够喉咁点算？
下次有时间会介绍埋电影版同埋音乐版嘅俾大家认识
记得密切留意，千其咪走鸡～

Friday 星期五 - 雨天

星期五
咁又一年

唔经唔觉，咁就过咗一年
悠悠荡荡咁就放咗成个星期假
年终假期就唔经唔觉咁就冇晒咗
估唔到一放完假返到公司就係星期五
睇嚟又係时候写返篇周记先得喇

新嘅一年，紧係惗住有个新嘅希望喇
今年遇着经济风暴，个个冇啖好食
係人都希望可以平平安安咁度过
我係个平凡嘅打工仔，一样唔会例外喇

家阵咁嘅心情，暂时都唔想惗咁多嘢住
惗得多都烦，目前为止一切顺其自然就最好
其他嘢。。。。等过完农历新年先算

上次讲要介绍个套漫画都整理得七七八八喇
过多两日就会放上嚟，到时记得留意下囖