Friday 星期五 - 阴天

星期五
悠长假期

踏入年尾，D无谓节日多之余
连D假期都特别多，係D钱唔见得会多
眨下眼，一年话咁快就过咗
睇嚟又要准备面对新嘅一年喇

呢个星期嘅节日咁多
相信对大家嚟讲紧係值得高兴嘎喇
但係对我嚟讲反而係害咗我

公司D人个个攞晒假，剩返我一个
搞到D嘢要一个人做晒，个部门一个人睇晒
赶死赶命，个人几乎要癫咁腻
好彩今日已经係星期五，冇咁多嘢忙
如果唔係咁搞落去个人唔死就假

平安夜个晚周围都係车，鬼死咁塞
D人全部出晒嚟，都唔知有乜咁好庆祝
我唔係基督徒，踎係屋企听hardcore好过

Sadie 最新单曲 - Ice Romancer

SADIE 最新单曲 - Ice Romancer
发售日：17/12/2008
共收录了四首新曲：
01-Ice Romancer
02-Marionette
03-Recall
04-Psychedelic Chemical Movie

继上次介绍Sadie嘅单曲《Grieving The Dead Soul》后
係度又要介绍Sadie嘅全新单曲俾大家认识下喇～

歌曲延续住Sadie一律嘅作风，传统jrock加hardcore演奏方式
加埋主音个把hardcore必备嘅爆喉声，简直衬到绝、正到爆
上星期试听完后觉得上比上一张单曲嚟得要好
尤其係音乐节奏、整体配合个方面，进步咗唔少

单曲所有歌都唔错，主打歌曲《Ice Romancer》最正～
用柔中带刚的演奏方式嚟到表达首歌嘅情感，冇得顶
以下就係主打歌曲《Ice Romancer》嘅PV
睇下大家可不可以feel到同我所讲嘅个种演奏方式先，哈哈～

Friday 星期五 - 晴天

星期五
贵人事忙

上星期个周记先讲到可以轻松咁过嘅
点知嚟到呢个星期就完全唔同晒

踏入年尾，则係每年最忙嘅时候
加上係设计方面有D转变，所以D进度都拖慢咗
被逼要嘥多D时间係设计上，搞到个头都大晒
连篇周记都唔记得写，到咗星期六嘅今日先知道
係度趁有D时间，写返篇补返数先

最近本人沉迷于一部讲述重金属摇滚嘅漫画
内容当中嘅表达手法同埋D画风都劲夸张搞笑
呢部漫画係日本同香港当地都牵起咗唔少话题
而且重已经开拍成电影添，风头可以话係一时无两

迟下会係度介绍俾大家认识，记得密切留意囖

Talk 弊 - 10th Anniversary 限量别注

今年係公司踏入第10个年头
为此周年纪念，顺理成章都会搞下D嘢咁喇
所以就依老细吩咐整咗件限量别注tee
嚟到庆祝Extreme踏入第10周年纪念之用

构思同概念方面就以简约为主
运用手势而非数目字嚟到代替《10》
能表达主题之余，更可以带出一点于平凡中的不平凡
再配以品牌不同的logo，放于件tee嘅前同后
同写上“10th Anniversary”哥德式字体配合
加埋个红黑白配色，更能直接咁带出品牌嘅摇滚宗旨

话明限量别注，件tee嘅数量当然唔多喇
加上冇係市面上发售，只係作为赠送之用
真係可以话係有钱都未必买得到
身为件tee嘅设计师，我当然会获赠一件喇

想要？可以去Extreme Shop了解下
话唔定会有意外惊喜嘎，哈哈～

Friday 星期五 - 雨天

星期五
风继续吹

呢个星期D心情都感觉非常之懒
几日假期加埋D雨成日落唔停
搞到个人死蛇烂蟮咁冇晒D心情做嘢
连写下个blog都懒，哈哈。。。。

基本上呢个星期都冇乜特别嘢好写喇
遇着假期不外乎係行下街、食下嘢或者饮下茶咁过
手头上D工作进度都因为假期而拖慢咗

不过都好嘅，忙里偷闲不嫐都係我嘅做人宗旨
趁住呢几日假期都休息咗唔少，条气都顺返D
个人都冇之前咁攰喇，剩係有D懒咁喇
哈哈。。。。

弊，突然之间有D眼瞓添
今日讲住咁多先啦，係咁～

Talk 弊 - Art Of Penang 城市男孩

槟城，对本人嚟讲有一种不一样的情怀
道地嘅文化加埋古色古香嘅建筑群
每次到访终会感觉到被一种本土嘅艺术气味围绕住
尤其係佐治市，感觉好怀旧、好王家卫

前几晚本太后于槟城之旅带咗本坐台日历返嚟
係本太后于佐治市一个慈善表演义卖时买嘅
此日历係由一个叫做“城市男孩”嘅艺术团体所制造嘅
听闻此团体係由当地D年轻人/学生所创
而且重係集合文化表演同埋艺术创作于一身，听落真係唔简单

日历当中的各种绘图都带有浓厚的槟城气味
每个月份都会有唔同嘅插图
以上所放嘅係日历封面同4月份嘅插图
虽然唔算得上係D乜大师级作品
但係当中D学生嘅心机係感觉得到嘅
真情流露加埋简单俐落个绘画方式
更能直接咁表露出当地人个种不一样的文化

Friday 星期五 - 阴天

星期五
劲眼瞓，好眼瞓

今个星期可以话係冇觉好瞓，点解？
工作量多就总所周知喇，连放咗工都鬼死咁唔得闲

日前手头上进行紧D嘢，所以被逼要搞到好夜先瞓
夜瞓都唔所谓，弊就弊连餐晚饭都要成12几点先食
有时候甚至连晚饭都未食就大觉瞓
连饿係乜都唔知，睇嚟咁搞法个胃唔穿窿就假
等下星期搞掂晒D嘢，要慢慢咁恢复返D正常人嘅生活先得
费事搞到老嚟周身病痛，有钱冇命享先阴公～

上星期驾车係Taman Bahagia LRT对面D住宅区搵人
冇意中俾我发现咗有个拥有一级设备嘅室外篮球场
夜晚个阵有灯光照亮之余，个场地环境同埋D设备重好正～
前几晚趁住有些少时间就同亚高佬两条友走去试下
果然冇令我失望，只係个地面有些少部分唔係咁理想
整体嚟讲都算唔错，有成80分咁多～

边位有兴趣一齐打波嘅可以係度联络我或参考以下嘅网址：

http://cforum2.cari.com.my/viewthread.php?tid=1410800&page=1&extra=page%3D1#pid51401298

今期嘅周记就到此为止，係咁先～

Talk 弊 - 塞尔特人条裤同埋骑士条裤

上星期日趁住购物嘉年华啱啱开始，就去咗1U度行下
好自然咁就旧地重游去咗某间铺头度扫D平货
今次又再以超荀价係个度入手咗两条篮球裤

个款同之前所入手条芝加哥公牛嘅红黑白colourway一样
不过就换咗係青白colourway嘅波士顿塞尔特人颜色
同埋深红白colourway嘅克里夫兰骑士颜色
两条裤同样係Champion出品，鬼死咁old skool
唔洗讲个Retro指数肯定爆晒灯喇～